Үткән аҙнала Ғафури районының Красноусол ҡасабаһында 1812-1814 йылдарҙағы Ватан һуғышында ҡатнашҡан башҡорт яугирҙарына – “Төньяҡ амурҙары”на арналған мемориаль баҡса һәм һәйкәлде (авторы - И.Ғ.Шәйәхмәтов) асыу тантанаһы булып үтте. Ошо сара тамамланғандан һуң “Красноусол” шифаханаһы биләмәһендә, Күрпәс бей һәйкәле эргәһендә Күрпәс бей призына ғәҙәти уҡтан атыу буйынса турнир булып үтте. Ғәҙәти уҡтан (башҡорт уғы) атыу буйынса турнирға республиканың төрлө төбәктәренән - Ауырғазы, Ишембай, Хәйбулла, Бөрйән, Баймаҡ, Әбйәлил, Учалы, Белорет, Ҡырмыҫҡалы һ.б. райондарынан, Силәбе, Ырымбур өлкәләренән, республикабыҙ ҡалаларынан алты тиҫтәнән ашыу уҡсы ҡатнашты. Уҡсыларҙы район мәҙәниәт һарайында теркәп, һәр ҡайһыһына йәрәбә номерҙары таратылды, милли кейемдәге Гөлшат Шаймарҙанова менән Лена Абыҙгилдина һәр ҡатнашыусы хаҡында мәғлүмәт тә туплай барҙы.
Уҡтан атыу ярышы бер нисә этаптан торҙо. Тәүге өс этапта 20, 30, 40 метр алыҫлыҡтан башта баҫып, һуңынан һыңар аяҡҡа тубыҡланып, аҙаҡҡы этапта аяғөҫтө торған килеш артҡа әйләнеп аттылар.

Былтыр Уҡлығая ҡаршыһында район биләмәһендә беренсе тапҡыр “Мәргән уҡсы” халыҡ-ара ярыш-фестивале булып уҙғайны. “Төньяҡ амурҙары” (етәксеһе Илдар Шәйәхмәтов) башланғысы менән ойошторолған был сараға Германия, Польша, Ҡытай, Литва кеүек илдәрҙән, Рәсәйҙең төрлө төбәктәренән көслө уҡсылар йыйылғайны. Ул саҡта райондан ни бары дүрт уҡсы – Илдар Абыҙгилдин, Илһам Байбулдин, Илшат Хәбибуллин һәм Айрат Сәйфуллин ҡатнашты. Тулыһынса уҡыр өсөн түбәндәге һылтанма буйынса үтегеҙ: https://vk.com/tabingazite