Мәжит Ғафури исемендәге Башҡорт академия драма театры яңы ижад миҙгелендә яңы проект - пластик спектакль әҙерләй. Ул Николай Крашенинниковтың "Амеля" романы буйынса ҡуйыла.
Романда тол ҡалған профессор ҡатында, дворяндар йортонда тәрбиәләнгән йәтим башҡорт ҡыҙының яҙмышы һүрәтләнә.
Күренеште пластик эссе тип билдәләргә була. Хәрәкәттәр, бейеүҙәр, күҙ ҡарашы, ҡул хәрәкәттәре - барыһы бергә ҡушылып синтетик жанрҙы барлыҡҡа килә. Спектаклде сәхнәгә ҡуйырға артистарҙың бар яҡтан да мөмкинселеге бар, тип иҫәпләй режиссер Айрат Абушахманов. Спектаклгә музыканы Санкт-Петербург ҡалаһынан композитор Олег Гудачев ижад иткән. Спектакль оркестр музыкаһы менән байытыласаҡ, шулай уҡ унда башҡорт йырҙары яңғыраясаҡ.