Иртәгә, йәғни 29 октябрҙә Әхмәт-Зәки Вәлиди исемендәге Милли китапхананың икенсе корпусында "Красною кистью рябина зажглась..." исеме аҫтында Марина Цветаеваның ижадына арналған әҙәби-музыкаль кисә үтәсәк.

Кисә Марина Цветаеваның тыуыуына 124 йыллығына бағышлана.

Сараны ойоштороусылар: Усень-Ивановское ҡасабаһының М.Цветаева музейы мөдире Ольга Саттарова һәм "Белебеевские известия" гәзитенең мөхәррире Любовь Иванова.

Бай эстәлекле программа әҙерләнгән, Усень-Ивановское ҡасабаһының М.Цветаева музейынан видео-презентация күрһәтеләсәк, шағирәнең шиғырҙарына ижад ителгән йырҙар яңғыраясаҡ. Шулай уҡ һәр теләүсе өсөн ирекле микрофон – Марина Цветаеваның шиғырҙарын һөйләү, уҡыу мөмкинлеге буласаҡ.

Кисәгә Башҡортостан Республикаһының халыҡ артисы, һүҙ сәнғәте оҫтаһы Александр Донгузов, актрисалар Альфия Кашбуллина, Диана Кулик, Юлия Ныркова, бард йырҙарын башҡарыусы Наталина Самыловска, «Птицы»театр-студияһы режиссеры Владимир Корчев, профессор, БДУ-ның кафедра мөдире Сергей Семенов саҡырылған.

Шулай уҡ әҙәбиәтселәр, китапханасылар, журналистар, студенттар һәм мәктәп уҡыусылары ҡатнашыуы көтөлә.

Гүзәл Багаева