Башинформ» мәғлүмәт агентлығы хәбәр итеүенсә http://www.bashinform.ru/bash/culture/ Мәскәүҙә рус һәм поляк телдәрендә «Берега огня и воды» китап-билингва донъя күрҙе. Был йыйынтыҡҡа башҡорт сатиригы Марсель Сәлимовтың совет осоронда яҙылған һәм рус теленә билдәле Өфө шағиры-сатиригы Михаил Воловик тәржемәләгән ҡыҫҡа мәҫәлдәре тупланған. Башҡорт авторының мәҫәлдәрен поляк теленә поляк шағиры Александр Навроцкий тәржемә иткән.

Мөхәррир-төҙөүсе Юлия Ковалевская инеш һүҙҙә былай тип яҙа: «Берега огня и воды» рус-поляк йыйынтығы Польшала киң тараласаҡ, һәм ошо илдең китап уҡыусылары Рәсәй яҙыусылары һәм шағирҙарының сифатлы тәржемәләнгән әҫәрҙәрен рәхәтләнеп уҡый аласаҡ».

Рәсәй Федерацияһының һәм БССР-ҙың атҡаҙанған мәҙәниәт хеҙмәткәре, Дуҫлыҡ ордены квалеры Марсель Сәлимов йәш сағында, Совет Армияһы офицеры булған саҡта, Польшала хеҙмәт иткән. Һуңғараҡ запастағы майор совет-поляк дуҫлығы хаҡында «Смелого пуля боится» тигән китап яҙған (Башҡортостан китап нәшриәте, 1990).

«Мин ул саҡта дуҫлыҡ мөнәсәбәтендәге Польшала ике йыл йәшәнем, «пжиязни» (дуҫлыҡ) һәм «кохани» (мөхәббәт) һүҙҙәре телдән төшмәй ине, – тип иҫкә төшөрә бөгөн Марсель Шәйнур улы. – Сирек быуаттан һуң Болгарияла халыҡ-ара славян шиғриәте фестивалендә сығыш яһағанда мин Евросоюз флагы фонында элекке дуҫтарыма, славяндарға ошолай тинем: «Нисек, илбаҫарға оҡшағанмынмы?! Бына мин дә шағирҙарҙың Польшаны азат иткәндә һәләк булған совет яугирҙәренең һәйкәлдәрен емереүселәрҙе һәм ҡәберҙәрен бысратыусыларҙы маҡтауҙарына ышанмайым».

Яңы рус-поляк йыйынтығы авторҙары һәм нәшер итеүселәр «Берега огня и воды» китабы славян илдәренең дуҫлығын тергеҙеүгә ярҙам күрһәтер, туғандаш халыҡтар араһында рухи күпер булып хеҙмәт итер, тип ышана.