Салауат дәүләт башҡорт драма театры өсөн 83-сө ижад миҙгеле уңышлы тамамланы. Актерҙар Ренат Ибәтуллинға, Мирас Йомағужинға һәм Рәмзиә Ғәйнулли­наға Башҡортостан Республикаһы Мәҙәниәт министрлығының Почет грамоталары тапшырылды. Шулай уҡ, Ибраһим Абдуллиндың “Эх, Өфө ҡыҙҙары!” пьесаһы буйынса ҡуйылған спектаклдә Майя роле өсөн Рәмзиә Мәҡсүтова, Шәүрә Шәкүро­ваның “Оляның бәхете” (“Олюшкино счастье”) пьесаһы буйынса ҡуйылған спектаклдә Ольга роле өсөн Баш­ҡорт­остандың атҡаҙанған артисы Нәүфилә Яҡупова йыл актерҙары тип иғлан ителде. Иң яҡшы актерҙарға 1993 йылдан аҡсалата премия тапшырыла.
Салауат театры сираттағы миҙгел­де “Ерҙәштәр” спектакленең премье­раһы менән япты. Башҡортос­тандың халыҡ шағиры Мостай Кәримдең “Ауыл адвокаттары” повесы буйынса спектаклде Мәскәү режиссеры Антон Федоров ҡуйҙы.
Театрҙың матбуғат хеҙмәтендә хәбәр итеүҙәренсә, 2015 – 2016 йылғы миҙгелдә салауаттар Ханты-Манси автономиялы округында һәм Силәбе өлкәһендә гастролдә булған. Йәмғеһе 177 спектакль ҡуйылған, шул иҫәптән өс яңы спектаклдең икәүһе — федераль грант аҡсаһына. Театр яҡшы йолаға әйләнгән проекттарын да дауам иткән. Улар иҫәбенә “Театр — инвалид балаларға”, “Театр төнө” инә. Салауат дәүләт башҡорт драма театры ҡарамағындағы “Арлекин” студияһына йөрөгән балалар “Таланттар планетаһы” халыҡ-ара фес­тиваль-конкурсында лауреат булған.