Хужа Насретдин – Урта Азия, Яҡын һәм Урта Көнсығыш халыҡтары фольклорындағы аҡыл эйәһе, тапҡыр һүҙле кеше образы, башҡорт көләмәстәрендә, уйҙырмаларында, мәҙәктәрендә, латифаларында ла сағыла. Хужа Насретдин прототибы тыумышы менән Төркиәнән сыҡҡан ниндәйҙер имам булған, тип раҫлайҙар. Фәҡирҙәрҙе яҡлаусы, ғәҙеллек өсөн көрәшеүсе тора-бара халыҡ юморы кәүҙәләнешенә әүерелеп киткән. 

Тиҙҙән, йәмле май айында, Мостай Кәрим исемендәге Милли йәштәр театрында Л.Соловьевтың «Хужа Насретдин тураһында повесть» дилогияһының тәүге өлөшө буйынса ҡуйылған «Хәйләһеҙ мажаралар»тип аталған спектакль премьераһы көтөлә. Ҡуйыусы режиссеры – Башҡортостандың атҡаҙанған сәнғәт эшмәкәре Мөсәлим Күлбаев, ҡуйыусы рәссам – Геннадий Скоморохов (Мәскәү), бейеүҙәрҙе Татарстандың атҡаҙанған сәнғәт эшмәкәре Сәлимә Әминева (Ҡазан) һала, трюктар ҡуйыусы – Айҙар Закиров (Мәскәү), композитор – Василий Тонковидов (Һамар), башҡорт теленә тәржемә авторы – БР атҡаҙанған артисы Рәмзил Сәлмәнов.