Кисә Мостай Кәрим исемендәге Милли йәштәр театрында «Пигмалион, йәки бер бәхәс хаҡында тарих» спектакле ҡуйылды. Ҡазан дәүләт йәш тамашасылар театры «йондоҙҙарын»ың сығышын баш ҡала халҡы йылы ҡабул итте.  

Билдәле романтик комедияға сағыу декорациялар ҡоролған, актерҙарҙың костюмдары ла юғары баһаға эйә. Төп героиня Элиза урамда сәскә һатып аҡса эшләй, тик тауарын бирергә генә ашыҡмай. Үҙенсә хәйергә йәшәй, фонетика буйынса профессор менән осрашыу уның тормошон ҡырҡа үҙгәртә. Мистер Хиггинс йәш ҡыҙҙан леди яһарға уйлай.

 Әйткәндәй, күрше төбәк театры артистары һуңғы тапҡыр республикала 2013 йылда сығыш яһаған. Быйылғы гастроль программаһы ла бай һәм мауыҡтырғыс. 

Ҡазан дәүләт йәш тамашасылар театры һәм Мостай Кәрим исемендәге Милли йәштәр театры араһында ике яҡлы килешеү төҙөлгән. Әле яҡташтарыбыҙ, рус труппаһы артистары Татарстанда. Башҡорт труппаһы иһә миҙгел асыуға етди әҙерләнә, көнө-төнө репетицияларҙа. Яңы премьера көтөлә. Сәхәнәлә Цагарелиҙың «Ханума» музыкаль комедияһы ҡуйыласаҡ.


Сығанаҡ: http://tv-rb.ru/bash/novosti/m-ni-t/tatarstan-artistary-f-l/

Татарстандың йәш тамашасы театры афишаһы: http://kulturarb.ru/ba/poster/?ELEMENT_ID=74489