Милли музыка ҡоралдары эшләү оҫтаһы, Башҡортостандың атҡаҙанған сәнғәт эшмәкәре Вәкил Шөғәйепов вафат булды
Башҡортостан мәҙәниәте ауыр юғалтыу кисерҙе. 81-се йәшендә күренекле музыка ҡоралдары оҫтаһы, Башҡортостандың атҡаҙанған сәнғәт эшмәкәре, «Рәсәй рухы» премияһы эйәһе Вәкил Шөғәйепов вафат булды. Уны милли музыка ҡоралдарын яһаған һәм реставрациялаған өсөн «башҡорт Страдиварийы» тип йөрөттөләр.
Һуңғы йылдарҙа ул ҡаты сирләне. Республика халыҡ ижады мәғлүмәте буйынса, маэстро менән хушлашыу иртәгә, 29 июнгә, Башҡорт дәүләт филармонияһы фойеһында сәғәт 9-ға билдәләнгән.
Вәкил Шөғәйепов 1936 йылдың 29 авгусында БАССР-ҙың Салауат районы Әлкә ауылында тыуған. Ҡазан художество училищеһын тамамлаған. Өфөләге 77-се урта мәктәптә черчение һәм рәсем дәрестәре уҡытыусыһы, РСФСР Художество фондының Башҡортостан бүлексәһе рәссамы булып эшләгән (1966—1981). 1981 йылда йышылған шпондан ҡурай яһауға тотондо. Оҫта үҙенең асышына патент алғандан һуң ҡурайҙы күпләп сығарыу башланды.
Вәкил Шөғәйепов думбыраны тергеҙеү менән дә шөғөлләнде. 1985 йылдың майында Вәкил Шөғәйепов эшләгән думбыра өлгөләре (сопрано, альт, бас) киң производствоға тәҡдим ителде һәм индерелде.
1995 йылда оҫта тамашасыларҙы үҙе реконструкциялаған ҡыл-ҡумыҙ менән таныштырҙы. Вәкил Шөғәйепов Өфө сәнғәт институтының башҡорт музыкаһы факультеты, күп кенә билдәле ҡурайсылар менән хеҙмәттәшлек итте. Халыҡ уйын ҡоралдарын яңыртыу буйынса проекттары өсөн 1988 йылда БАССР-ҙың атҡаҙанған сәнғәт эшмәкәре тигән исемгә лайыҡ булды.
