Милләттәштәребеҙ күпләп йәшәгән Рәсәй төбәктәренә туған телдә китаптар ебәреләсәк.
Башҡортостанға күрше урынлашҡан 7 төбәк: Силәбе, Ҡурған, Һамар, Ырымбур, Һарытау өлкәләре, Пермь крайындағы китапханаларға һигеҙ мең дананан ашыу китап оҙатыла. Сара “Рәсәй халҡы берҙәмлеген нығытыу һәм Башҡортостан халыҡтарын үҫтереү” дәүләт программаһы сиктәрендә бойомға ашырыла, ти Милли китапхана директоры Юлдаш Ураҡсин.
Был проект дәүләт программаһы нигеҙендә миллион һумға тормошҡа ашырыла.
Акцияның маҡсаты – илебеҙ төбәктәрендәге милләттәштәребеҙгә рухи-мәҙәни ярҙам күрһәтеү. Китаптар араһында башҡорт классиктары әҫәрҙәре, фәнни китаптар, һүҙлектәр һәм балалар әҙәбиәте бар. Исемлектә бөтәһе 86 китап. Улар Рәсәй төбәктәрендәге 18 китапханаға бүленгән.