Мәсетле районының Мәҙәниәт йортонда хеҙмәт коллективтары араһында уҙғарылған республика үҙешмәкәр сәнғәт смотры башланды.

Беренсе көн ПЧС-86, “Мечетлинская жизнь» гәзите редакцияһы, балалар баҡсалары, ООО «Тепловик», эш менән тәьмин итеү үҙәге, үҙәк китапхана системаларының хеҙмәтсәндәре сығыш яһаны.

Үҙешмәкәр сәнғәт хеҙмәткәрҙәре моңло йырҙар, дуэттар башҡарҙы, бейеү коллективтары дәртле бейеүҙәре менән ҡыуандырҙы, сәхнә түренән шиғырҙар яңғыраны.

Баһалама ағзалары башҡарыу оҫталығы менән бер рәттән номер композицияһына, ҡуйылыш, костюмдарға иғтибар бүлеп еңеүселәрҙе билдәләргә тырышты.

Һәр тамашасыға байрам программаһы таратылғайны, кисә аҙағында тамашасы үҙенә оҡшаған номер өсөн тауыш биреү мөмкинселеген алды.Күпселек тауыш йыйып ПСЧ-86 һәм “Мечетлинская жизнь» гәзите редакцияһы башҡарыуындағы «Кадриль» бейеүе беренселеккә сыҡты.

Концерт һуңында жюри 5 уңышлы номерҙы һайлап алды: «Три пня» ( «Колосок» балалар баҡсаһы), «Кадриль» (гәзит редакцияһы, ПСЧ-86), оҫта шиғыр һөйләүсе (И. Исаева, «Светлячок» балалар баҡсаһы), «Я буду жить для тебя» йыры (Рита Кучерова, «Колосок» балалар баҡсаһы) һәм ҡубыҙҙа уйнаусы (И. Хафизов, ООО «Теловик»). Еңеүселәр тиҙҙән Гала-концерттта сығыш яһаясаҡ.
 
Гүзәл Багаева