Ошо көндәрҙә Туймазы театрының Мәскәү ҡалаһында гастролдәре уҙҙы. Коллектив башҡаланың Мюзик-холл бинаһында “Берҙәм Рәсәй” Бөтә Рәсәй сәйәси партияһы булдырған “Бәләкәй ҡалаларҙағы театрҙар” проекты сиктәрендә Хәбибулла Ибраһимов пьесаһы буйынса сәхнәләштерелгән “Еҙнәкәй” һәм Александр Коровкин әҫәре буйынса ҡуйылған “Түтәйҙәр” спектаклдәрен тәҡдим итте.

 Гастролдәрҙе Туймазы татар дәүләт драма театры директоры, Башҡортостандың атҡаҙанған мәҙәниәт хеҙмәткәре Фирҙәт Фәрит улы Ғәбиҙуллин асты. Артистар көлкөлө сәхнә әҫәрҙәрен илһамланып тулы зал тамашасыға уйнаны. Мәскәүлеләр ижадсыларҙы ҡайнар алҡыштары менән ҡанатландырып, спектаклдәрҙе яратып, ихлас ҡараны. 
Театр һөйөүселәр араһында РФ Федераль Федерация Советының Мәғариф, фән һәм мәҙәниәт буйынса комитет рәйесенең беренсе урынбаҫары Лилиә Салауат ҡыҙы Ғүмәрова, “Заманса” продюсерлыҡ үҙәге директоры Ринат Харис улы Вәлитов, шағирә, “Бәллүр ҡәләм” журналистика премияһы лауреаты Нәзифә Харис ҡыҙы Кәримова, “Түтәйҙәр” комедияһының авторы Александр Анатольевич Коровкин да бар ине. 
Гастролдәр театр тарихы биттәрендә ҡалды, Мәскәү тамашасыһы менән осрашыу дәүерендә алған йылы, яҡты тәьҫораттар ижадсылар күңеленә матур хәтирәләр булып уйылды.