Февраль айы Башҡорт дәүләт акдемия драма театры өсөн республикабыҙ ҡала һәм ауылдары буйлап уҙғарылған ҡышҡы гатролдәре менән үҙенсәлекле. 10 февраль көнө Стәрлетамаҡ концерт – театр берләшмәһендә «Ҡаһым түрә» (Б.Бикбай, Х.Иргалин, режиссеры -О.Ханов, төп ролдә - Башҡортостандың халыҡ артисы Азамат Ғафаров) драмаһы күрһәтеләсәк. 11 февраль 10.00 сәғәттә Салауат Башҡорт дәүләт драма театрына килгән кескәй тамашасыларҙы А.Толстой әҫәре буйынса «Алтын асҡыс» (Буратино) әкиәте көтә. Ә кисен өлкәндәргә театрҙың өр-яңы спектакле - Мөҙәрис Бағаев пьесаһы буйынса тулҡынландырғыс, ваҡиғаларға бай «Ике төш» драмаһы тәҡдим ителә. СССР-ҙың халыҡ артисткаһы Гөлли Мөбәрәкова билдәләүенсә, әҫәрҙең сюжет һыҙығы бик оригиналь, ваҡиғаларҙы героиня төш итеп күрә һәм был күренеш уға артабан йәшәргә, юғалтыуҙарҙы күтәрә алыуға көс бирә». Февралдең икенсе яртыһында театр «Әбейүшкә@тущка.ru” (Р.Кинйәбаев, реж. И.Муллабаев) заманса комедияһы менән гастролгә сығасаҡ. 25 февралдә был комедия Баймаҡ ҡалаһында уйналһа, 26 февраль - А.Мөбәрәков исемендәге Сибай Башҡорт дәүләт драма театры сәхнәһендә үтә. Спектакль сиктәрендә төп ролдәрҙең береһен башҡарыусы Рәсәйҙең атҡаҙанған, Башҡортостандың халыҡ артисткаһы Эльвира Юнысова, Рәсәйҙең һәм Башҡортостандың халыҡ артисы, С.Юлаев исемендәге дәүләт премияһы лауреаты Заһир Вәлитов яратҡан тамашасылары менән үҙҙәренең юбилейын да билдәләй. 27 февралдә инде «Әбейүшкә@тущка.ru” комедияһын Күгәрсен яҡтарында – Мораҡ ҡасабаһында көтәләр.