«Мәҙәниәт» милли проекты сиктәрендә Баймаҡ районы мәҙәниәт хеҙмәткәрҙәренә автоклуб тапшырылды.

Баймаҡ районында 92 ауыл, уларҙың 55-ендә мәҙәниәт усаҡтары эшләй. Иң төпкөл ауыл район үҙәгенән  85 саҡрым алыҫлыҡта урынлашҡан. Күсмә автобус клуб булмаған ауылдарҙа концерттар ойошторорға мөмкинлек бирә. Яҡтыртыу һәм тауыш ҡорамалдары менән йыһазландырылған, сәхнәһе булған автоклуб файҙаланыуға тапшырылыу менән, урындағы мәҙәниәт хеҙмәткәрҙәре ауыл эшсәндәрен йыр-бейеүҙәре менән ҡыуандырҙы.

Халыҡты мәҙәниәткә ылыҡтырыу - милли проекттың төп бурыстарының береһе. Күсмә мәҙәниәт үҙәктәре ошо маҡсатты тормошҡа ашырыуға булышлыҡ итәсәк.