Республикала Яңы йыл тамашалары башланды. “Мөғжизәле Башҡортостан” проектына старт бирелде, тип хәбәр итәләр Эшҡыуарлыҡ һәм туризм буйынса дәүләт комитетынан. Проектҡа ярашлы, быйыл Ҡыш Бабайҙың ҡунаҡ тирмәләре биш урында ҡуйылды. Яңы йыл тылсымсыһы Ҡандракүлдәге тирмәлә байрам тамашаһында ҡатнашты ла инде. Был аҙнала Бөрө, Стәрлетамаҡ һәм Абҙаҡҡа ҡунаҡҡа килергә йыйына. Киләһе аҙна башында Ҡыш Бабай Өфөгә килә, ә декабрь аҙаҡтарында көньяҡ райондар буйлап сәфәргә сығасаҡ.

Яңы йыл күңел асыу саралары өсөн Өфөлә ике төп майҙансыҡ тапшырыуға әҙерләнә. Ул шыршылар – Ленин исемендәге майҙанда һәм Конгресс-холл алдындағы майҙанда. Нәҡ бында боҙ ҡаласыҡтары, тауҙар, лабиринттар, әкиәт геройҙарының һәм яңы йыл символы һындары урынлашасаҡ.

Ленин исемендәге майҙанда Благовещен районынан 30 метрлыҡ йәшел һылыуҡай ҡуйылған да инде. Яҡын көндәрҙә Яңы йылды байрам итеү атрибуты Конгресс-холл алдындағы майҙанда ла урын аласаҡ. Өфөлә йүп фатирлы йорттар эргә-тирәһенә бөтәһе 64 яңы йыл шыршыһы һәм шул сама боҙ тауы ҡуйыу күҙаллана.
Бынан тыш, баш ҡаланың һәр районын үҙҙәренең үҙәк шыршыһы биҙәйәсәк.