Кәкүк сәйе - быуаттар төпкөлөнән килгән матур байрам. Ул йәйҙе ҡаршылауға арналған һәм “кәкүк айы” тип йөрөтөлгән майға тура килә. Халҡыбыҙҙың Кәкүк сәйе байрамы йолаларыбыҙҙы һаҡлап алып ҡалыуҙа, йәш быуынға еткереүҙә мөһим роль уйнай. 
Нуриман районының Йәмле Ҡариҙел йылғаһы буйында урынлашҡан Павловка паркында “Кәкүк сәйе” III республика этнофестивале үтте.

 Унда республикабыҙҙың 25 районынан фольклор коллективтары ҡатнашты. Быйылғы йола байрамында олоһо ла, кесеһе лә берҙәй ихлас ҡатнашты, ярыш та сәмле барҙы. 

“Кәкүк сәйе” байрамында шау- шыулы “Кәкүк карнавалы”, сувенирҙар күргәҙмә-йәрминкәһе, үләндәр белгесе Гордеевтың “Кәкүк сәйе” семинары, шифалы үләндәр һәм башҡорт сәйенән ауыҙ итеү, тѳрлѳ конкурстар, музыкаль фольклор коллективтарының концерты булды.

 “Кәкүк сәйе” III республика этнофестиваленә Белорет районынан да барҙылар һәм, тәүге тапҡыр ҡатнашыуҙарына ҡарамаҫтан, уңышлы сығыш яһап, призлы урындар яуланылар. “Иң яҡшы кәкүк йыры” номинацияһында Асының “Еңгәләр” халыҡ фольклор ансамбле (етәксеһе - Йәмилә Сәлимйәнова) - I, “Кәкүк һыны”н кәүҙәләндереүҙә шығайҙар (етәксеһе - Сәғирә Ғәлиуллина) - I, “Кәкүк бейеүе”н башҡарыуҙа - Шығайҙан Гүзәлиә Сәйфуллина (етәксеһе - Лира Хәйруллина) I урын яулаһа, май үләндәренән генә әҙерләнгән сәйе менән “Иң яҡшы башҡорт сәйе рецебы” номинацияһында Хөсәйендән Рәйлә Иҫәнғужина III урын алды.

Ә Мөхәмәт ауыл клубы мөдире Гөлниса Мансурова “Иң яҡшы кәкүк костюмы” номинацияһында лауреат исеменә лайыҡ булды. Еңеүселәр Республика халыҡ ижады үҙәгенең, Нуриман район хакимиәтенең Маҡтау ҡағыҙҙары һәм ҡиммәтле бүләктәре менән бүләкләнде.
Көн оҙоно Ҡариҙел йылғаһы буйы йыр-моң, балаларҙың шат тауыштарынан гөрләп торҙо.

Сығанаҡ: http://ural-rb.ru/2139-kkk-sye-etnofestivale-emeshle-buldy.html