Театр тарихында быға оҡшаш ваҡиғалар осрап тора, был күренеш, бигерәк тә классик һәм художество йәһәтенән ваҡыт һынауын үткән, заманалар үҙгәреү менән актуаллеген юғалтмаған пьесалар буйынса спектаклдәр яҙмышына бәйле: тиҫтә йылдар өҙлөкһөҙ сәхнәлә барып та, темаһы, идеяһы, тәрбиәүи йәһәттән репертуарҙа артабан да ҡалыуына ихтыяж ҙур икән, был спектакль башҡарыусылары алыштырылып (сер түгел, быуындар алмашынып тора), күп ҡулланыуҙан таушалған сәхнә йыһаздары яңыртылып, уға яңы һулыш өҫтәлә.

Илшат Йомағоловтың мәшһүр «Нәркәс» трагедияһы буйынса режиссер Илдар Ғиләжев ҡуйған (композиторы - Урал Иҙелбаев) мелоромантик трагедияһы 2001 йылдың аҙағында сәхнә күргәйне. 15 йыл дауамында спектаклде меңәрләгән тамашасы ҡарап илһам алған, «Нәркәс» төрлө Халыҡ – ара фестивалдәрҙә ҡатнашҡан. Әммә был аҫыл әҫәрҙе сәхнәлә күрергә теләүселәр һис кәмемәй.

Хәйер, үҙе лә ошо сәхнәлә ижад иткән күренекле сәхнә оҫтаһы, драматург Илшат Йомағоловтың милли әҙәбиәттә трагедия жанрындағы иң билдәле пьесаһы буйынса спектакль, сәхнәбеҙ биҙәге булып, артабан да йәшәргә тейеш.

 Тамашасылар «Нәркәс»те яңыртылған вариантта киләһе йылдың февраль айында күрәсәк. Нәркәс - Гөлнара Ҡаҙаҡбаева, Гөлназ Хайсарова, Тимерхан – Руслан Хайсаров, Артур Кәбиров. Башҡа ролдәрҙә лә һиҙелерлек үҙгәрештәр бар, Мәҫәлән, Зөмрәтте өс актриса – Суфия Ҡорбанғәлиева, Тәнзилә Хисамова, Айһылыу Йомағолова башҡарасаҡ.

Сығанаҡ: М. Ғафури исемендәге Башҡорт дәүләт академия драма театры сайты