Ағымдағы йылдың 23-24 июнь көндәре Октябрьский ҡалаһында «Распахнись, душа казачья!» III төбәк-ара казак мәҙәниәте фестивале үтә. Йылдан-йыл бәйгенең географияһы киңәйә, популярлаша бара, ҡатнашыусылар һаны ла бермә-бер арта. Быйылғы фестивалдә Башҡортостандан ғына түгел, күрше төбәктәрҙән дә 300-гә яҡын конкурсанттың ҡатнашыуы көтөлә.
Сараны ойоштороусы-Октябрьск ҡала хакимиәтенең матбуғат хеҙмәтенән хәбәр итеүҙәренсә, фестиваль республика халыҡтарының мәҙәни үҙенсәлеген һаҡлап ҡалыуға, казак йолаларын һәм мәҙәниәтен тергеҙеүгә һәм нығытыуға, иң яҡшы үҙешмәкәр коллективтарының башҡарыу оҫталығы тәжрибәһен таратыуға, төбәк-ара ижади бәйләнеш һәм хеҙмәттәшлек булдырыу маҡсаттарын үҙ эсенә алған.
Казак мәҙәниәте фестиваленең конкурс программаһы бай төҙөлгән. Фестиваль сиктәрендә төрлө йыр-бейеү, йолалар һәм ғөрөф-ғәҙәттәр менән танышырға мөмкин буласаҡ.