Бөгөн, 7 февралдә, Республика йортонда төбәк Башлығы Радий Хәбиров Башҡортостан Яҙыусылар союзының яңы рәйесе Айгиз Баймөхәмәтов менән осрашты. Ул 2022 йылдың декабренән ойошмаға  етәкселек итә.

Осрашыуҙа башҡорт әҙәбиәтен үҫтереү, авторҙарға һәм нәшриәт эшмәкәрлегенә ярҙам итеү мәсьәләләре тикшерелде. Яҙыусылар союзы 300-ҙән ашыу прозаикты, шағирҙы, драматургты берләштерә, тип һөйләне Айгиз Баймөхәмәтов. 2024 йылда берекмә 90 йыллыҡ юбилейын билдәләй.

Башҡортостан Башлығы республиканың Союз эшмәкәрлегенә, шулай уҡ авторҙарҙың ижади башланғыстарына һәм проекттарына булышлыҡ итәсәген һыҙыҡ өҫтөнә алды.

- Айгиз Ғиззәт улы, һеҙҙе яңы вазифаға тәғәйенләнеүегеҙ менән ҡотлайым. Башҡортостан Яҙыусылар союзының бик абруйлы ойошма икәнен беләм. Һүҙ оҫталарыбыҙ йәмғиәттә әхлаҡлылыҡ идеяларын тарата, илһөйәрлек һәм традицион ҡиммәттәргә хөрмәт тәрбиәләй, - тине Радий Хәбиров. - Ике йыл элек яҙыусылар берләшмәһе менән осраштыҡ. Бер нисә йөкләмә үтәлде, ҡайһы берҙәре әлегә ғәмәлгә ашырылыу өҫтөндә. Был мәсьәләләрҙе ентекле тикшерергә тәҡдим итәм.

Башҡортостандың Яҙыусылар союзы рәйесе ойошма эшмәкәрлегенең төп йүнәлештәре хаҡында һөйләне. Улар иҫәбендә – башҡорт авторҙарының әҫәрҙәрен киң ҡатламға еткереү, китап уҡыу мәҙәниәтен популярлаштырыу, ижади саралар – конкурстар, фестивалдәр һәм күргәҙмәләр үткәреү.

Айгиз Баймөхәмәтов шулай уҡ Яҙыусылар союзының XIX быуатҡа ҡараған архитектура һәм тарих ҡомартыҡыһы булған Поликарпов йортонда урынлашыуын билдәләне.

Радий Хәбиров 2023 йылда бинала ремонт эштәрен башларға һәм киләсәктә уның нигеҙендә яҙыусылар өсөн заманса ижади киңлек булдырырға ҡушты.