2018 йылда Башҡортостан республиканың халыҡ шағиры Назар Нәжмиҙең 100 йыллыҡ юбилейы билдәләнә. Күптән түгел Башҡортостан Хөкүмәте Йортонда республика Хөкүмәте Премьер-министры урынбаҫары Салауат Сәғитов рәйеслегендә юбилей саралары тураһында ойоштороу комитеты ултырышы үтте.

Шағирҙың 100 йыллығына һәм иҫтәлегенә Өфө ҡалаһында һәм Дүртөйлө районында төрлө саралар уҙғарылыуы көтөлә: 3-4 февраль көндәрендә шағирҙың тыуған төйәгендә Дүртөйлө районында тантаналар уҙа. Сарала  Башҡортостан һәм Татарстан шағирҙары һәм яҙыусыларының ҡатнашыуы көтөлә.

Өфөлә шағирҙың быуат юбилейы  5 февралгә тәғәйенләнгән. «Родина» кинотеатрында  Назар Нәжмиҙең ижадына һәм тормошона бағышланған  «Яныуҙан һәм хистән ҡойолған» исемле фильм күрһәтеләсәк. Кинотаҫманың сценарий авторы Гәүһәр Батталова, режиссеры Әлфиә Арыҫланова.

Ошо көндө үк киске сәғәт 7-лә Хөсәйен Әхмәтов исемендәге Башҡорт дәүләт филармонияһының Ҙур залында уның Хәтер кисәһе үтәсәк.

Ағымдағы йылдың  июнь айында юбилей саралары сиктәрендә «Өфө йүкәләре» республика әҙәби фестивале ойоштороласаҡ.