Ағалы-энеле Якоб менән Вильгельм Гриммдарҙың әкиәттәренә бағышлап республикабыҙҙың һуҡырҙар өсөн махсус китапханаһы уҡыусылар араһында онлайн-викторина уҙғарҙы. Викторина Skype ярҙамында ойошторолдо.

Ике команда 28-се һанлы Өфө махсус коррекция интернат-мәктәбе уҡыусылары “Әкиәтселәр” командаһы һәм Нефтекамск ҡалаһының балалар-үҫмерҙәр китапханаһының тифлоүҙәк уҡыусылары көс һынашты.

Бер-береһенә ҡатмарлы, ҡыҙыҡлы һәм мауыҡтырғыс һорауҙар яуҙырып белемдәрен күрһәттеләр.

Мәктәп уҡытыусылары балаларҙы викторинаға әҙерлек алып барыу менән бер рәттән «Храбрый портняжка» әкиәтен сәхнәләштерергә ярҙам иткән. Балалар шиғыр, баснялар уҡып байрамға йәм өҫтәнеләр.

9,5:10 иҫәбе менән 28-се һанлы Өфө махсус коррекция интернат-мәктәбе уҡыусыларының “Әкиәтселәр” командаһы еңде. Бүләктәргә ҡыуанып ҡына ҡалманы уҡыусылар, режиссер Рим Шәрәфетдиновтың тифлокомментариялы «Ни пуха, ни пера» мультипликацион фильмын ҡарап шатландылар.

Гүзәл Багаева