Иртәгә-7 июлдә Ауырғазы районының Төрөмбәт ауылы эргәһендә "Өршәк буйы уйындары" байрамы уҙғарыла. Байрам программаһында халыҡ уйындары, төрлө конкурстар, көрәш һәм башҡа спорт ярыштары ҡаралған. Бигерәк тә Өршәк һәм Дим буйҙары башҡорттарына ғына хас уйындарға ҙур өҫтөнлөк биреләсәк. Шулай уҡ республиканың эстрада йондоҙҙары һәм райондың ижади коллективтары сағыу концерт программаһы әҙерләй.

Быйылғы сара Башҡортостандың Мәҙәниәт министрлығы, Бөтә донъя башҡорттары ҡоролтайы, Ауырғазы районы хакимиәте һәм Төрөмбәт яҡташтар берлеге тарафынан ойошторола. Улар башҡа байрамдарға оҡшамаған Мең ырыуы башҡорттары йолаларына нигеҙләнгән йыйын вәғәҙә итә. Бынан тыш, Өршәк һәм Дим буйында урынлашҡан төбәктәр тирмәләр ҙә ҡорасаҡ.