Дүртөйлө районының Семилетка ауылында капиталь ремонттан һуң күптән көтөлгән Мәҙәниәт йорто асылды. Ул «Башҡортостан Республикаһы ойошторолоуҙың 100 йыллығына — 100 объект» республика программаһы объекттары исемлегенә инде.

Мәҙәниәт йортонда ҙур эштәр башҡарылған: уның ҡыйығы алмаштырылған, фасады яңыртылған, биләмәгә асфальт түшәлгән, бинаға ингән ерҙә тротуар плитәһе һалынған. Объектты төҙөкләндереү өсөн төбәк ҡаҙнаһынан 100 миллион һум самаһы аҡса тотонолған, тип хәбәр итә республика Төҙөлөш һәм архитектура буйынса дәүләт комитетының матбуғат хеҙмәте. Яңыртылған Мәҙәниәт йорто тамашалар һәм клуб зонаһына бүленгән. Спорт сараларын уҙғарыу өсөн спорт залы ҡаралған.

Тиҙҙән ауыл клубында Дүртөйлө балалар художество мәктәбе филиалы, китапхана асыла. Киләсәктә Дүртөйлө балалар музыка мәктәбе филиалын асыу күҙаллана.