Үткән ялда "Башҡортостан" дәүләт концерт залында Башҡортостан Республикаһының халыҡ артисы, Башҡортостан Республикаһының атҡаҙанған сәнғәт эшмәкәре, Өфө ҡалаһының почетлы гражданы, Рәсәй Композиторҙар союзы һәм Яҙыусылар союзы ағзаһы, билдәле композитор Рим Хәсәновтың ижадына арналған "Һаумы, маэстро" концерты уҙҙы.
Бөтә донъя башҡорттары ҡоролтайы Президиумы рәйесе Эльвира Айытҡолова Рим Хәсәновҡа башҡорт йәмәғәт ойошмаларының юғары наградаһын - "Ал да нур сәс халҡыңа!" миҙалын тапшырҙы.
Рим Мәхмүт улы Хәсәнов - 400-ҙән ашыу йыр, балет һәм романс авторы. Рим Хәсәновтың композициялары шулай уҡ татар, инглиз, немец һәм башҡа телдәрҙә яңғырай. Композиторҙың "Өфө йүкәләре", "Мәңгелек мөхәббәт", "Юҡҡа түгелдер" кеүек йырҙары башҡорт эстрадаһы классикаһының миҫалына мәңгелеккә әүерелде һәм башҡорт мәҙәниәте тарихында лайыҡлы урын алды.