Бөгөн, 2 февралдә, Өфө ҡалаһының Үҙәкләштерелгән күмәк китапханалар системаһы Сталинград һуғышында Еңеүҙең 80 йыллығына арналған уҡыуҙарҙа ҡатнаша. Сараны М.И. Рудомино исемендәге Бөтә Рәсәй сит ил әҙәбиәте китапханаһы уҙғара. Тура трансляция Культура.РФ порталында ошо һылтанма буйынса уҙасаҡ https://www.culture.ru/live/broadcast/45683/chteniya-k-80-letiyu-pobedy-v-stalingradskoi-bitve.

Китапханасылар Василий Гросмандың «Тормош һәм яҙмыш», Виктор Некрасовтың «Сталинград окоптарында», Юрий Бондаревтың «Эҫе ҡар» тигән әҫәрҙәренән өҙөктәрҙе бер нисә телдә уҡып ишеттерәсәк. Сара өсөн текстар махсус рәүештә Рәсәй халыҡтары телдәренә - башҡорт, бүрәт һәм коми – тәржемә ителгән.

Үҙҙәренең тәржемәләрен Коми Республикаһының Милли китапханаһы, Башҡортостан Республикаһы Өфө ҡалаһы ҡала округының Үҙәкләштерелгән күмәк китапханалар системаһы, Иркутск өлкәһенең Хужир ҡасабаһы китапханаһы, Бүрәт Республикаһының Х.Намсараев исемендәге Дәүләт академия драма театры, Әрмәнстандың Милли китапханаһы тәҡдим итәсәк.

Өфө китапханалары хеҙмәткәрҙәре Василий Гроссман, Виктор Некрасов һәм Юрий Бондаревтың әҫәрҙәрен башҡорт шағирәһе Лариса Абдуллинаның тәржемәһендә уҡыясаҡ.

Тапшырыу Өфө ваҡыты буйынса киске сәғәт 8-ҙә башлана.