Хөсәйен Әхмәтов исемендәге Башҡорт дәүләт филармонияһы хәбәр итеүенсә, Рәмил Ғәйзуллин Николай Осипов исемендәге Халыҡ ҡоралдары оркестрының халыҡ-ара проектында ҡатнаша.

    Танылған музыкант Рәмил Ғәйзуллин Рәсәйҙең Николай Осипов исемендәге Милли академия халыҡ музыка ҡоралдары оркестрының «Донъя турнеһы» проекты сиктәрендә сығыш яһаясаҡ. Тамаша 6 апрель Мәскәү ҡалаһында Петр Чайковский исемендәге Концерт залында  үтәсәк.

   Проекттың авторы Н.Осипов исемендәге Милли академия халыҡ музыка ҡоралдары оркестрының художество етәксеһе һәм дирижеры Рәсәйҙең халыҡ артисы, профессор Владимир Андропов. Мәртәбәле сарала Рәсәйҙең байтаҡ төбәктәренән, шул иҫәптән Башҡортостандан, Ингушетиянан, шулай уҡ Әзербайжандан, Сүриәнән һәм башҡа илдәрҙән музыканттар ҡатнаша. Улар донъя халыҡтары көйҙәрен һәм йырҙарын башҡарасаҡ. 

   Билдәле  ҡурайсы, Башҡортостан республикаһының халыҡ ҡоралдары милли оркестрын ойоштороусы, Башҡортостандың халыҡ артисы Рәмил Ғәйзуллин проектта башҡорт халҡының милли музыка мираҫын күрһәтәсәк. «Мәскәү халҡына һәм ҡунаҡтарына халҡыбыҙҙың алыҫ меңйыллыҡтар төпкөлөнән килгән оло тарихын, рухи мираҫын ҡурай моңдары аша еткересәкмен. Петр Чайковский исемендәге Концерт залында был инде минең һигеҙенсе сығышым», - тип, ҡыуанысы менән уртаҡлашты Рәмил Мәүлит улы.

   «Донъя турнеһы» проекты Рәсәй Федерацияһының Мәҙәниәт министрлығы ярҙамы менән ойошторола.