Башҡортостан, Мәскәү, Санкт-Петербург, Саха (Яҡут) Республикаһы, Хакасия, Алтай һәм Беларусь Республикаһы оҫталарының ун биш эше Башҡортостан Республикаһы Милли музейының 160 йыллығына арналған күргәҙмәлә урын алды. Экспозиция «Ат иле» I төбәк-ара ижади проектын тормошҡа ашырыу сиктәрендә үткәрелә, ә күргәҙмәне асыусы төп экспонат - «Аҡбуҙат» башҡорт халыҡ эпосында йырланған ҡанатлы ат скульптураһы.

«Ат иле» йомғаҡлау күргәҙмәһенең нигеҙе - һынлы сәнғәттә, графикала, автор һәм биҙәү-ҡулланма техникаһында ат образын художестволы интерпретациялау.

Башҡорттарҙың көнкүрешендә һәм тормошонда аттың роле, уның Башҡортостандың мәҙәни коды менән тығыҙ үрелеп барыуы хаҡында БР Милли музейы директоры урынбаҫары Таһир Фәттәхов һөйләне.

 - Башҡорт өсөн ат - дуҫ, фекерҙәш, яугир, тыныс тормошта ла, хәрби бурысты үтәгәндә лә даими юлдаш.  Йырҙарҙа, ҡобайырҙарҙа, легендаларҙа һәм эпостарҙа йылҡы образы юҡҡа ғына йырланмай. Күргәҙмә бай, сағыу килеп сыҡҡан һәм бының өсөн проектта ҡатнашҡан рәссамдарға рәхмәт әйткем килә, - тине Таһир Булат улы.