Үткән аҙнала Салауат дәүләт башҡорт драма театрында «Йөрәк майым!» исемле яңы спектаклдең ябыҡ премьераһы үтте. Спектаклде ҡаҙаҡ режиссеры, Көнсығыш Ҡаҙаҡ өлкә йәштәр театрының художество етәксеһе Айдын Салбанов сәхнәгә ҡуйҙы. Төп ролдәрҙе Рәмзиә Мәҡсүтова һәм Рафаэль Ғәйнуллин башҡарҙы.
Спектаклдә мәңгелек темаларҙың береһе – әсә һәм бала һөйөүе сағылыш тапты.
Салауат драма театры коллективы пандемия осоронда яңыса эшләргә өйрәнде, репетициялар онлайн форматта үтте. Ғәйнуллиндар ғаиләһе үҙизоляция ваҡытында Йылайыр районы Сәлим ауылында булды һәм көн дә режиссер менән бәйләнешкә сыҡты.
Спектаклдең премьераһы ябыҡ рәүештә үтте. Хәҙер театр яңы миҙгелдә Салауат ҡалаһы кешеләрен һәм ҡунаҡтарын яңы спектакль менән ҡыуандырырға әҙерләнә.