Тиҙҙән Салауат дәүләт башҡорт драма театры күптәребеҙ яратып уҡыған Василий Шукшиндың хикәйәләренә таянып яҙылған “Шукшин” спектаклен тамашасы хөкөмөнә сығарасаҡ.

Театрҙың совет әҙәбиәтенең мираҫ әҫәрҙәренә беренсе тапҡыр тотоноуы. "Ваня, ты как здесь?", "Миль пардон, мадам", "Микроскоп", "Верую", "Мой зять украл машину дров" хикәйәренә таянып ҡуйылған был постановка тамашасыларға бик оҡшар тигән теләктәбеҙ.

Спектаклдең ҡуйыусы - режиссеры Мәскәү ҡалаһынан Антон Федоров. Беренсе тапҡыр Антон Федоров Салауат театрында Мостай Кәримдең “Ауыл адвокаттары” повесына таянып “Ерҙәштәр" спектаклен сәхнәләштергәйне инде. Ҙур уңыш менән барған тәүге спектакль тамашасыларға бик оҡшаны.

Режиссерҙың килеүен артистар ҙур түҙемһеҙлек менән көттө, репетициялар башланған да инде. Сәхнә өсөн туҡымалар, декорация өсөн материалдар һатып алынған да инде.Режиссерҙың ҡыҙыҡлы идея, ниәттәре бик күп. Тәржемә менән ҡыйынлыҡтар булманы, әҫәрҙе рус теленән башҡортсаға тәржемә эшен З.Исмәғилев исемендәге ӨДСИ –ның башҡорт теле уҡытыусыһы Гөлсәсәк Саламатова үҙ өҫтөнә алды.

Ролдәрҙә: БР халыҡ артисы Риза Мәһәҙиев, БР атҡаҙанған артистары Нәүфилә Яҡупова, Гөлфирә Сәфиуллина, Фәтих Ҡолһарин, шулай уҡ театр артистары-Рөстәм Фазылов, Риф Мусин, Нәркәс һәм Мираҫ Йомағужиндар, Рафаэль Ғәйнуллин, Айһылыу Лоҡманова, Рәмзиә Мәҡсүтова, Лиана Ниғмәтуллина, Револь Ғималов һәм Радик Ғәлиуллин.

Мәғлүмәт өсөн: Федоров Антон Павел улы –Стәрлетамаҡ ҡалаһында тыуған. 2006 йылда Б.В. Щукин исемендәге ВТУ тамамлаған, әлеге көндә режиссер һөнәре оҫталыҡтарына уҡып йөрөй. 2007 йылдан алып Мәскәү ҡалаһының «Другой театр», «Практика» театрҙарында эшләй.

Спектаклдең премьераһы 2016 йылдың 4 ноябренә планлаштырылған.

Тамашаға рәхим итегеҙ!

Гүзәл Багаева