«Код доступа» автономиялы коммерцияға ҡарамаған ойошмаһы М. Х. Төхвәтшин исемендәге һуҡырҙар өсөн Башҡортостан республика махсус китапханаһы менән берлектә Салауат Низаметдиновтың баян өсөн алты әҫәренән торған йыйынтыҡты Брайль форматында сығарҙы. Был проект президент гранттары Фонды ярҙамында тормошҡа ашырылды. Йыйынтыҡ 110 данала баҫылған.
Ноталар төбәктең инклюзив һәм махсуслаштырылған мәктәптәре, муниципаль район китапханалары буйынса бүленәсәк һәм шәхси заявкалар буйынса физик шәхестәр өсөн асыҡ буласаҡ.
Музыка – тыуған илгә һөйөүҙе белдереү өсөн ҡеүәтле инструмент. Композиторҙар, шағирҙар һәм рәссамдар кеүек үк, тыуған яҡтарынан илһам ала, уның матурлығын һәм рухын сағылдырған әҫәрҙәр ижад итә. Танылған башҡорт композиторы, Рәсәй Федерацияһының атҡаҙанған сәнғәт эшмәкәре Салауат Низаметдиновтың ижады ошондай бәйләнештең сағыу миҫалы булып тора. Ул үҙе Өфөнөң һуҡыр балалар өсөн мәктәп-интернатында уҡыған, әҫәрҙәрен Башҡортостандың музыка мәктәптәрендә өйрәнәләр.
«Һуҡыр һәм насар күргән уҡыусылар хәҙер Салауат Низаметдиновтың ижады менән яҡындан таныша һәм Башҡортостандың музыкаль мәҙәниәтен тәрәнерәк өйрәнә аласаҡ», – ти М.Х. Төхвәтшин исемендәге һуҡырҙар өсөн Башҡортостан республика махсус китапханаһы директоры Ирина Күсәрбаева, был проекттың мөһимлеген һыҙыҡ өҫтөнә алып.
Брайль форматындағы ноталар тиҙҙән махсус китапханаларға һәм уҡыу йорттарына тапшырыласаҡ.