Башҡортостан йәштәрен 20 майҙа Салауат Юлаев һәйкәле янында «Киске уйын» сараһы көтә. Өфө студенттарының әүәлдән яратып йыйылған урыны – Салауат һәйкәле – йәнә ҡурай һәм гармун моңдарынан гөрләп торасаҡ.

 Йәштәрҙе яҙғы кистә «Юлдаш» радиоһының алып барыусылары әҙерләгән мауыҡтырғыс уйын-конкурстар, мәҙәк-көләмәстәр көтә. Республиканың Яҡташтар ассоциацияһы Экология һәм айырыуса һаҡланған тәбиғәт биләмәләре йылына арналған эко-квест үткәрергә йыйына. Башҡорт эстрадаһы йондоҙҙары мотлаҡ үҙҙәренең дәртле йыр-моңо менән ҡыуандырасаҡ.

 Күркәм тамаша киске 6-ла башлана.

Сараның төп маҡсаты – Башҡортостан йәштәрен таныштырыу, дуҫлаштырыу, әүҙем йәштәр ойошмаларын асыҡлау, ҡала һәм республиканың мәҙәни йолаларын байытыу.

Ойоштороусылары – «Юлдаш» радиоһы, Бөтә донъя башҡорттары ҡоролтайы, Өфө ҡала хакимиәте һәм хакимиәттең йәштәр эштәре буйынса комитеты, Өфө ҡалаһының Киров районы хакимиәте, Яҡташтар ассоциацияһы.

Киске уйынды октябргә тиклем айына ике тапҡыр үткәреү планлаштырыла.