Сибай артисы Йәғәфәр Нәҙершин өр-яңы концертына саҡыра
Республика, халыҡ-ара йыр бәйгеләре лауреаты, талантлы уҡытыусы, Башҡортостандың мәғариф отличнигы, йырсы, композитор, ишле ғаилә башлығы — биш бала атаһы Йәғәфәр Нәҙершиндың Сибай концерт-театр берекмәһендә вокал артисы булып эшләй башлауына бер генә йыл. Әммә ошо ҡыҫҡа ваҡыт арауығында ул үҙен ысын сәхнә оҫтаһы, һәр яҡтан килгән артист итеп танынып та өлгөрҙө һәм 2024 йыл йомғаҡтары буйынса филармонияның иң шәп йырсыһы булып та танылды.
Әлеге мәлдә Йәғәфәр Нәҙершин үҙе тыуып үҫкән Бөрйән районында концерттар ҡуя, ә 30 ғинуарҙа "Беҙҙең самый йырлар саҡ" тигән өр-яңы программаһын Сибай тамашасыһына күрһәтәсәк.
— Концертта, үҙем яратып башҡарған йырҙарҙан тыш, өр-яңы композициялар яңғыраясаҡ. Шулай уҡ ижадташ дуҫтарым, оркестр, «Сибай» халыҡ бейеүҙәре ансамбле ҡатнаша, — ти йырсы.
Билеттар берекмә кассаһында һәм сайтында һатыла. Пушкин картаһы ғәмәлдә.
Концерт кисе сәғәт 7-лә башлана.
Йәш сикләүе: 6+.
Фото Сибай концерт-театр берекмәһенән алынды.
