Арыҫлан Мөбәрәков исемендәге Сибай башҡорт дәүләт драма театрында Ишмулла Дилмөхәмәтовтың әҫәре буйынса ҡуйылған “Тере тупраҡ” спектакленең премьераһы ҙур аншлаг менән үтте. Тамашаның ҡуйыусы режиссеры – Башҡортостандың халыҡ артисы Азат Нәҙерғолов, рәссам-биҙәүсеһе – Рөстәм Баймөхәмәтов, композиторы – Башҡортостандың атҡаҙанған сәнғәт эшмәкәре Илшат Яхин, балетмейстеры – Башҡортостандың атҡаҙанған артисы Сулпан Асҡарова, костюмдар буйынса рәссам – Әлиә Байрамғолова һәм хәрби алыш, һуғыш сәхнәләрен ҡуйыусы – Рәсәй Каскадерҙар ассоциацияһы ағзаһы Роберт Йылҡыбаев.
Сибай театрының художество етәксеһе Дамир Ғәлимов әйтеүенсә, спектакль Башҡортостандың 100 йыллығына һәм “Берҙәм Рәсәй” партияһының “Бәләкәй ҡалалар театрҙарына ярҙам итеү” проекты нигеҙендә сәхнәгә сығарыла. Әйткәндәй, былтыр ошо проектҡа ярашлы һәм Мостай Кәримдең тыуыуына 100 йыл тулыу хөрмәтенә “Ҡыҙ урлау” әҫәре сәхнәләштерелде.
Сибай тамашасыһы яңы спектаклде ҡыуанып ҡаршы алды, ниһайәт, тарихи темаға ҙур әҫәрҙең сәхнәгә сығыуына шаһит булды. Спектаклдә тотош ижади труппа, йәғни 30-ҙан ашыу артист ҡатнаша. Әлеге ваҡытта Урал аръяғы райондарындағы мәҙәниәт усаҡтарына гастролгә сыҡҡан театр артистары. Халыҡсан театрҙың халыҡ араһында булыуына йәнә бер асыҡ миҫал был. Сәхнәләрҙе тултырыр, тамашасыларҙы уйландырыр һәм һиҫкәндерер, үткән тарихыбыҙға бер аҙға булһа ла ҡайтанан әйләнеп ҡайтырға мәжбүр итер “Тере тупраҡ” күптәрҙең күңелендә тере ҡуҙ булып балҡыясағында һис тә шик юҡ. Тыуған ерҙең тере тупрағы һәр беребеҙҙең күңелендә булһын.