А. Мөбәрәков исемендәге Сибай дәүләт башҡорт драма театрында яңы спектакль буйынса эш тамамланыуға яҡынлашты. Рәсәйҙең йәш драматургы һәм сценарисы Ярослава Пулиновичтың әҫәре буйынса “Һағыштарым тулы ғазаптарым...” спектакле - 2020 йылда "Берҙәм Рәсәй" партияһының "Бәләкәй ҡала театрҙары" проекты буйынса ҡуйылған икенсе постановка.

Ҡуйыусы режиссеры - Рәсәйҙең атҡаҙанған, Башҡортостандың халыҡ артисы, Рәсәйҙең һәм Башҡортостандың Салауат Юлаев ис. Дәүләт премиялары лауреаты Олег Ханов. Композитор - Башҡортостандың атҡаҙанған сәнғәт эшмәкәре, Ш.Бабич ис.премияһы лауреаты Урал Иҙелбаев. Ҡуйыусы-рәссам – Башҡортостандың атҡаҙанған мәҙәниәт хеҙмәткәре Радик Сафин. Хореограф – Залина Усманова.

Төп ролдәрҙе Башҡортостандың атҡаҙанған артисткаһы Әлфирә Йосопова һәм Башҡортостандың халыҡ артисы Риф Сәйфуллин башҡара. Шулай уҡ спектаклдә Башҡортостандың халыҡ артистары - Зифа Баязитова, Нурзиә Әбдрәшитова, Башҡортостандың атҡаҙанған артистары - Айгөл Хәкимова һәм Әлфирә Ғәлләмова; Айгөл Зәйнуллина, Гөлфиә Мәҡсүтова, Вадим Ғилманов, Резеда Сәфиуллина ҡатнашалар.