Тиҙҙән Сибай ҡалаһында “Урал аръяғы тауышы” бәйгеһе уҙғарыла. Конкурста йыр-моң һөйөүсе 15 – 45 йәшлек һәүәҫкәрҙәр ҡатнаша ала. Ул биш этапта үтәсәк. Ойоштороусылар – Сибай ҡалаһы хакимиәте, ҡаланың Мәҙәниәт бүлеге.
Шарттарға ярашлы, һәр конкурсант үҙ йырын тәҡдим итә. Шулай уҡ дуэт, трио, квартет сығыштары ла әҙерләргә мөмкин.
Дүрт этаптан һуң конкурстың финалы буласаҡ, ул апрелгә планлаштырылған. Еңеүсегә бүләк – 50 мең һум аҡса.