Мәҙәни  сара «Беҙҙең барыһы ла килеп сыға!» тип аталған девиз аҫтында уҙғарылды. Башҡорт һәм татар мәҙәни көндәре Силәбе өлкәһе район-ҡалаларында йәшәүсе арҙаҡлы шәхестәрҙе, милли йолаларға тоғро ҡалыусыларҙы бер майҙанға йыйҙы. Фестивалдә халыҡ бейеүҙәре, оҙон көйҙәр яңғыраны.

Байрам тамашасылары күңеленә бигерәк тә «Дуҫлыҡ» милли үҙәге коллективының сығыштары хуш килде. Артистар төрлө халыҡ бейеүҙәрен берҙәй оҫта башҡарыуы менән һоҡландырҙы.
Фестивалдә Рәсәй мосолмандары үҙәк диниә назараты ҡарамағындағы Силәбе төбәк-ара Этҡол муниципаль районы идаралығы һәм Татар конгресы менән хеҙмәттәшлек  килешеүенә ҡул ҡуйылды. Яҡын арала ошондай уҡ килешеүҙе өлкәлә эшләп килгән Башҡорт ҡоролтайы менән төҙөү күҙаллана. Фестиваль барышында фойела ҡул эштәренән торған күргәҙмә эшләне. Байрам ҡунаҡтары милли аҙыҡ һәм эсемлектәрҙән ауыҙ итте.