30 ноябрҙә, Әсә көнөндә, Стәрлетамаҡ дәүләт театр-концерт берләшмәһендә тамашасыларҙы филармониянан һәм Илшат Йомағолов исемендәге башҡорт драма театрынан бай программа көтә.

Көндөҙгө сәғәт 12-лә «Әсәйем һәр саҡ булһын!» музыкаль программаһы башлана. (0+), киске 6-ла — «Мөхәббәт һәм күгәрсендәр» спектакле (12+).

Көндөҙгө балалар өсөн музыкаль-интерактив программала филармония солистары иң ҡәҙерле кеше — әсәләргә арналған билдәле йырҙарҙы бүләк итәсәк. Йәш тамашасыларҙы һәм уларҙың әсәләрен күңелле конкурстар һәм викториналар ҙа көтә.

Программала музыкаль-әҙәби лекторийҙың йәш һәм талантлы артистары: Илдар Әбдрәшитов, Анжела Арыҫланова, Айгиз Уйылданов, Әҙилә Кәримова, Зарина ҡотлоғужина, Гөлназ Рәхмәтуллина — ҡатнаша. Лекторий етәксеһе — Башҡортостандың халыҡ артисы Елена Калинина.

Кисен Илшат Йомағолов исемендәге Башҡорт драма театры Владимир Гуркиндың күренекле комедияһы буйынса спектаклгә саҡыра. «Мөхәббәт һәм күгәрсендәр» спектакле — ябай кешеләр тураһында ысын мәғәнәһендә халыҡ тарихы. Спектакль ғаилә ҡиммәттәренең мөһимлеген, туғандарҙы һәм яҡындарҙы һаҡлау кәрәклеген иҫкә төшөрә.

Ролдәрҙә: Башҡортостан Республикаһының атҡаҙанған артистары Ләйсән Кәримова, Марат Зөбәйеров һәм драма артистары Гөлнара Йәрмиева, Илгиз Әкимбәтов, Әлфинур Ғәзимова, Нәркәс Йосопова, Фәнил Ҡарасурин, Алтынай Сәғитова, Илнур Сәлимгәрәев, Илнур Атйетәров, Лилиә Ахунова, Камилла Камалова. Режиссер-ҡуйыусы: Башҡортостан Республикаһының атҡаҙанған сәнғәт эшмәкәре Мөсәлим Күлбаев.