21 февралдә Стәрлетамаҡ дәүләт театр-концерт берекмәһе филармонияһы Бөйөк Ватан һуғышында ҡатнашҡан башҡорт яҙыусыһы, журналист һәм йәмәғәт эшмәкәре Хәким Ғиләжевтең 100 йыллығына арналған программа тәҡдим итә. Тамаша “Бөйөклөгө өсөн ҙур эштәрҙең Мин әле лә һалдат, яҡташтар!” тип атала.

Тыуған ил яҙмышы менән йәшәгән, уның  бәхетле киләсәге өсөн һуғышта ҡан ҡойоп, ижадында Башҡортостанды, халыҡты, тыуған телде ҙурлаған Хәким Ғиләжев – әҙәбиәтебеҙҙең йөҙөк ҡашы, Ватаныбыҙҙың бөйөк шәхесе.

Кисәлә “Ашҡаҙар” башҡорт эстрада-фольклор төркөмө легендар шәхестең шиғырҙарын, поэмаларын уҡый, уның һүҙҙәренә яҙылған йырҙарҙы йырлай, бормалы һәм сағыу тормошона, бай һәм мауыҡтырғыс ижад юлына байҡау яһай. Концерт программаһы тылсымлы ҡурай, фортепиано моңдары менән үрелеп бара.

– Хәким Ғиләжевте “әҙәбиәтебеҙҙең генералы” тип йөрөтәләр. Эйе, был исем уның ижадына ла, шәхесенә лә тап килә. Уның тәрән фәлсәфәүи әҫәрҙәре, йөрәккә үтеп инерлек нәсихәттәре, тормошсан кәңәштәре, биргән һабаҡтары, зирәк фекерҙәре йәшәйешебеҙҙән, заманыбыҙҙан бик күп йылдарға  алда бара кеүек. Хәким Ғиләжевкә арналған концерт программаһы йылы хистәр, моңло йырҙар менән һуғарыла, яҡты, һикәлтәле тормош юлын яҡтырта,– ти филармонияның художество етәксеһе, Башҡортостан Республикаһының атҡаҙанған сәнғәт эшмәкәре Лира Фәйзуллина.

Концерт программаһында Башҡортостандың атҡаҙанған артистары Гөлназ Иҙрисова, Ғафуан Фазуллин, Рәмил Әүбәкиров, Миңлеғәле Хәсәнов, Наталья Подкуйко (фортепиано), Ришат Хәмитов, республика һәм халыҡ-ара конкурстар лауреаттары Динар Абдуллин, Азамат Асаинов, йыр конкурстары лауреаттары Зөлфиә Әүбәкирова һәм Гүзәлиә Татлыбаева, Альберт Яппаров (баян), Эльмира Баймырҙина, Зарина Ҡотлоғужина ҡатнаша.

Сара көндөҙгө сәғәт 2-лә башлана.

Белешмә өсөн телефон һандары: 8 (3473) 43-98-18.

Билеттар һылтанма буйынса: https://sgtko.ru/afisha/2023/02/21/