Башҡортостандың атҡаҙанған мәҙәниәт хеҙмәткәре Нәзифә Мостафа ҡыҙы Иҫәнғужинаның исеме Стәрлетамаҡ ҡалаһының китап донъяһында күптән билдәле.
Үҙе етәкселек иткән Абдулҡадир Инан исемендәге китапхананы яңы китаптар менән даими тулыландырып ҡына ҡалмай, Стәрлетамаҡ яҙыусыларын, шағирҙарын пропагандалауға ла ҙур өлөш индерә ул. Улай ғына ла түгел, ҡала кимәлендә уҙғарылған бихисап сараларҙың сценарийҙарын яҙа, ойоштороусы булараҡ та сығыш яһай, республика матбуғатында ҡалабыҙҙың мәҙәни тормошон йыш яҡтырта.

Китапхана урынлашҡан биҫтәлә мәктәп уҡыусылары, студенттар менән төрлө мауыҡтырғыс саралар: видео-лекторийҙар, әңгәмәләр, конкурстар, оҫталыҡ дәрестәре, флеш-мобтар үткәрә. 2013 йылдан бирле бында “Етегән йондоҙ” клубы, 2014 йылдан алып Ҡатын-ҡыҙҙар клубы эшләй. Яҙыусылар, ағинәйҙәрҙең йыйылыу урыны ла ошонда. Китапхана ху-жабикәһе улар менән хеҙмәттәшлек итеү юлдарын таба белә. 2016 йылда тәү тапҡыр уҙғарылған ғаилә, мөхәббәт һәм тоғролоҡ байрамы “Етегән”де ойоштроусыларҙың береһе лә ул.

Нәзифә Мостафа ҡыҙы бар ерҙә өлгөрә: үҙәкләштерелгән китапханалар системаһында профсоюз комитеты ағзаһы, “Берҙәм Рәсәй” сәйәси партияһында һәм Стәрлетамаҡ ҡала башҡорттары ҡоролтайының башҡарма комитетында ла ағза булып тора. Бергә эшләгән хеҙмәттәштәре уның һәр кем менән уртаҡ тел таба белеүенә, һөнәри оҫталығына һоҡлана. Тырыш хеҙмәте ҡала мәҙәниәт бүлегенең, мәҙәниәт хеҙмәткәрҙәре профсоюзының маҡтау ҡағыҙҙары менән баһаланған.
Күптән түгел Өфө дәүләт нефть техник университеты филиалы студенттары менән Баш-ҡортостанға бағышланған ҡала кимәлендә матур сара уҙҙы. Күренекле шағир Салауат Рәхмәтулланың юбилей кисәһенең сценарий авторы һәм алып барыусыһы ла, ҡалабыҙҙың хөрмәтле аҡһаҡалы, яҙыусы, драматург Кәбир Аҡбашевтың күркәм юбилейын үткәреүгә ең һыҙғанып тотонған кеше лә ул. Тулыраҡ: http://gazeta-ashkadar.ru/2017/03/