Башҡортостан юлдаш телевидениеһы хәбәр итүенсә, күптән  түгел Свердловск өлкәһендә һабантуй үткән.

Милли байрамдан йәше лә, ҡарты ла ситтә ҡалманы. Ижади коллективтарҙың сығышы, ҡурай моңдары милләттәштәребеҙҙе берләштерҙе. Һабантуйҙа уларға халҡыбыҙ тарихы, милли музыка ҡоралдары менән танышыу мөмкинлеге бирелде. Байрамда Башҡортостан вәкилдәре лә ҡатнашты.

Берәүҙәр сәхнәлә ижади коллективтарҙың сағыу сығыштарын ҡарап кинәнһә, икенселәр һабантуй майҙанының бер осонда барған ат сабышы бәйгеһенә ашыҡты. Ҙур майҙанда ойошторолған этнотирмә лә күптәрҙә ҡыҙыҡһыныу уятты. Ул Хәйбулла район музейы тарафынан ойошторолған. 
Һабантуйҙа ҡатнашыусылар милли аш-һыуҙан ауыҙ итте. Күптәрҙе ҡорот ҡайнатыу, талҡан тартыу күренештәре ҡыҙыҡһындырҙы. Вәзәм ауылы оҫтабикәләре үҙҙәренең ҡул эштәрен күргәҙмәгә ҡуйған. Уңған ханымдар әйберҙәрҙең нимәнән эшләнгәне, биҙәктәрҙең мәғәнәһе тураһында ентекләп һөйләп биреүҙән тартынманы.
Һабантуйҙа ҡатнашыусылар көршәк ватыу, тоҡ менән йүгереү, ҡатыҡтан аҡса эҙләү кеүек уйындарҙа әүҙем ҡатнашты. Ҡунаҡтарҙы айырыуса уҡтан атыу бәйгеһе ҡыҙыҡһындырҙы. Уҡ менән йәйәне тәүге тапҡыр тотоп ҡараусыларға оҫталыҡ дәрестәре лә үткәрелде. 
Һабантуй майҙанында ун ике милли ихата урын алды. Был күрше өлкәлә йәшәүсе милләттәштәребеҙгә төрлө халыҡ йолалары, көнкүреше менән яҡындан танышыу мөмкинлеген бирҙе. Свердловск өлкәһендә  ун меңгә яҡын кешене бер майҙанға йыйған милли  байрам шаулап-гөрләп үтте.