Бөтә донъя башҡорттары ҡоролтайының башҡарма комитетынан хәбәр итеүенсә, Коми Республикаһында быйыл май айында ғына ойошторолған Башҡорт милли-мәҙәни автономияһы “Регион добрососедства” республика конкурсында ҡатнашып, Сыктывкарҙа Башҡорт мәҙәниәте көндәре үткәреүгә 70 мең һумлыҡ грант отҡан.

Сара быйыл 15-17 ноябрҙә үткәреләсәк. Сыктывкар башҡорттары Коми халҡын төп уйын ҡоралыбыҙ ҡурай менән таныштырырға, Башҡортостан рәссамдарының картиналарынан күргәҙмә ойошторорға йыйына. Ойошма етәксеһе Рәүҙәт Ниғмәтуллин әйтеүенсә, Башҡортостандан ижади делегация килеүе көтөлә.