Ырымбур дәүләт филармонияһында Өфө дәүләт сәнғәт институтының махсус фортепиано кафедраһы мөдире, профессор Рөстәм Шәйхетдиновтың концерты үтте.
Сара Леопольд һәм Мстислав Ростроповичтар исемендәге ХII Ырымбур халыҡ-ара йәш башҡарыусылар конкурсы барышында уҙғарылды. Өфө пианисы күп йылдар ошо музыкаль ярыштың баһалама комиссияһында эшләй.
— Бәйге барышын оҙаҡ йылдар күҙә­тергә тура килде, Ростропович менән осрашып аралаштым. Жюри ағзаларының киске концерттары яҡшы йолаға әүерелде. Был юлы Бах, Моцарт, Шопен әҫәрҙәрен башҡарҙым. Тамашасы аяғүрә баҫып алҡышланы, ихлас ҡабул итте, — тине музыкант.
Әйткәндәй, конкурста Рәсәйҙән, БДБ, шулай уҡ сит илдәрҙән 16 йәшкә тиклемге музыканттар ҡатнаша. Улар виолончель, скрипка, фортепиано йүнәлештәре буйынса көс һынаша. Рөстәм Шәйхетдинов әйте­үенсә, 40 пианист араһында Башҡортостан вәкилдәре лә бар. Улар урта махсус музыка колледжында һәм 13-сө балалар музыка мәктәбендә уҡый. Бәйге йомғаҡтары тиҙҙән билдәле буласаҡ.

Сығанаҡ