Алдан хәбәр итеүебеҙсә, танылған театр белгесе Алексей Бартошевич Өфөгә килде. Уның Өфөгә килеүе Башҡортостан театр сәнғәте өсөн әһәмиәтле ваҡиға булып тора.

Алексей Вадимович Бартошевич - Рәсәйҙең күренекле театр белгесе, театр тарихсыһы, Уильям Шекспир ижады буйынса белгес. Мәшһүр актёр В.И.Качаловтың ейәне, Мәскәү художество театры Мәктәп - студияһында спектакль ҡуйылышы факультетына нигеҙ һалыусы В.В.Шверубовичтың улы. Алексей Вадимович Рәсәй театр сәнғәте академияһының (РАТИ ) сит ил театры тарихы кафедраһы мөдире, сәнғәт фәндәре докторы, профессор, Рәсәйҙең атҡаҙанған фән эшмәкәре күп һанлы премиялар лауреаты.

А.В. Бартошевич М. Ғафури исемендәге Башҡорт дәүләт драма театрының «Йософ һәм Зөләйха» музыкаль легендаһын (Ҡ.Ғәли, Ю.Сафиуллин), «Антигона» (Ж.Ануй) драмаһын ҡараны,  З.Исмәғилев ис. Өфө дәүләт сәнғәт институты студенттары һәм педагогтары менән осрашты.   М. Ғафури исемендәге  Башҡорт дәүләт драма театрының Бәләкәй залында Башҡортостандың халыҡ артисы Алмас Әмиров башҡарыуында А.Кивиряхктың «Әлифбанан бер себеш» монодрамаһы ҡуйылды. Спектаклдәр ҡарауҙан һуң  фекер алышыу, театр артистары менән осрашыу үтте.