Башҡорт дәүләт ҡурсаҡ театры «Театрҙар – балаларға» проекты сиктәрендә матди ярҙам алды. Театрға 7.7 миллион һум бүленгән. Был программа Рәсәйҙең 198 балалар һәм ҡурсаҡ театрҙарын берләштерә һәм уларҙың материаль-техник базаһын нығытыуҙы, репертуарҙарының сифатын яҡшыртыу өсөн шарттар булдырыу һәм төбәктәрҙә балалар өсөн яңы сәхнә әҫәрҙәрен популярлаштырыуҙы маҡсат итеп ҡуя.
Бүленгән ярҙам сиктәрендә ҡурсаҡ театры башҡорт риүәйәттәре һәм ҡобайырҙарына таянып ижад ителгән Владимир Аношкин пьесаһы буйынса «Орнамент нимә тураһында йырлай? » (режиссеры – Альберт Имаметдинов) спектаклен сәхнәләштерергә ниәтләй. Шулай уҡ Роман Сванидзе пьесаһы буйынса «Йәшә” спектаклен (режиссеры- Виктория Щербакова) сәхнәгә ҡуясаҡ. Гастролдәр өсөн яңы автобус һәм онлайн-трансляциялар үткәреү өсөн махсус ҡорамалдар алыу шулай уҡ ошо проект аҡсаһына алынасаҡ.
Башҡорт дәүләт ҡурсаҡ театры менән бер рәттән «Театрҙар – балаларға» проекты ярҙамына шулай уҡ Мостай Кәрим исемендәге Милли йәштәр театры һәм Сибай концерт-театр берләшмәһе составында «Сулпан» балалар театры лайыҡ булды.
Матди ярҙамдың дөйөм суммаһы 25.5 миллион һумдан ашыу. Артистарҙың ял ваҡыты үткәс был аҡсалар театрҙарға күсә. Спектаклдәрҙең премьераһы 2020 йылдың сентябрь-октябрь айҙарында көтөлә.