Балаларҙың хыялдарын тормошҡа ашырырға «Теләктәр шыршыһы» хәйриә акцияһы һәм «Берҙәм Рәсәй»ҙең депутаттар корпусы ярҙам итә. Быйыл да акцияны ойоштороусылар балаларҙың ижади теләктәренә иғтибар бүлергә ҡарар итте. Бөгөн Нефтекама коррекция мәктәп-интернатының 9-сы класс уҡыусыһы Фәнис Рахмановтың да хыялы тормошҡа ашты.

«Нефтекама дәүләт филармонияһына «Ижади теләктәр шыршыһы»н ойоштороусыларҙан клоун менән сығыш яһарға хыялланған баланан хат барлығын хәбәр итте. Беҙҙең цирк студияһы артистары ойоштороусыларҙың үтенесен иғтибарһыҙ ҡалдырманы. "Теләктәр шыршыһы" проекты ярҙамында бөгөн Фәнистең күптәнге хыялы тормошҡа ашты», - ти филармония директоры Ринат Ғайсин.