М. Ғафури исемендәге Башҡорт дәүләт академия драма театры хәбәр итеүенсә, февраль айы актер Артур Кәбиров  өсөн бик ижади айҙарҙың береһе булып хәтерҙә ҡаласаҡ – сөнки уның тамашасы алдында тағы ла яуаплы сығышы бар – 28 февралдә театрҙың Бәләкәй залында  “Ут биреп торған сағым” исемле акустик концерты буласаҡ.

Артур Кәбиров һәм уның йыр-моңға ғашиҡ дуҫтары Роман Пожидаев (гитара), Резана Вәлиева (скрипка), Марина Яковлева (флейта), Рәсим Лоғаманов (һуҡма инструменттар), Аяз Нухов (виолончель) менән бергә февралде оҙатасаҡ.

“Заман башҡа –заң башҡа” тиһәләр ҙә, әммә бөгөн дә мөхәббәткә, изгелеккә дан йырлаған сәхнә әҫәрҙәрен тамашасылар көтөп ала. Эйе, заман үҙгәрә, ваҡыт үҙгәрә, геройҙар үҙгәрә, әммә һәр бер быуындың үҙенең яратҡан геройы сәхнәгә сыға. Бөгөнгө көндә лә, өлкән быуынға алмашҡа йәштәр килә. Йәштәребеҙ ҙә – талантлы, дәртле, сағыуҙар һәм сәхнәгә, ижадҡа тоғролар.

Бөгөнгө көндә популяр йәш артистарҙың береһе - Артур Кәбиров. Уның исеме театр һөйөүселәргә яҡшы таныш. “Ҡара йөҙҙәр”ҙә (М.Ғафури) - Закир, “Хыялға ҡаршы” спектаклендә (А.Баймөхәмәтов, А.Ишбулдина) - Ильяс, “Февраль.Буран”да –Рәми ролдәре аша танып беләләр уны. Гитарала уйнап башҡарған йырҙары интернет киңлектәрен яулаған.

Февраль айында уның ижади тормошона тағы бер образ килеп инде – “Нәркәс” мелоромантик трагедияһында Тимерхан ролен башҡарҙы.

Артурҙың “Ут биреп торған сағына” шаһит булып, уның йөрәк йылыһын тойоп, күңел даръяһын байҡап, ҡыштың һуңғы көнөн күңелле итеп үткәрергә теләһәгеҙ -28 февраль көнө БДАДТ –ның Бәләкәй залына рәхим итегеҙ!