Борай районының ауыл биләмәләре араһында барған Кино йылына бағышланған “Беҙ – объективта” конкурсы дауам итә.

 Күптән түгел Вострецово ауыл биләмәһе Яңы Бикмәт ауыл мәҙәниәт йортонда үҙенең конкурс программаһын тәҡдим итте.

 “Тыуған ерем йырҙарыма күсә, хистәремдә йәшәй һаҡланып” тип аталған концертта Вострецово, Яңы Бикмәт, Камилән, Арҫланбәк, Яңы Йәлдәк үҙешмәкәр сәнғәт коллективтары ҡатнашты. “Көйҙе бел” музыкаль уйыны тамашасыларға бала-саҡтан таныш фильмдарҙы иҫкә төшөрҙө. Ауыл биләмәһенең видеофильмы Вострецово ауылы тарихын сағылдырылды.

Конкурс эстафетаһын 4-се ноябрҙә Салҡаҡ ауыл биләмәһе дауам итте. Утыҙ номерҙан торған концерт программаһы бер һулышта ҡаралды.

Концерт ауыл таланттарының башҡорт халыҡ көйҙәрен башҡарыу менән башланып китте. Уҡытыусы-пенсионер Фәүил Ғиззәтуллин был юлы ла сәхнә күрке булды. 14 кешене берләштергән баянсылар ансамбле, Салҡаҡ ауылы мәҙәниәт йортоноң мәҙәни етәксеһе Илмира Латыпова етәкләгән “Әхирәттәр” клубы, элекке район мәҙәниәт бүлеге мөдире ветеран-пенсионер Рәдис Солтановтың йыр-моңдары тамашасы тарафынан айырыуса йылы ҡабул ителде. Эльвира Тимерғәлиева, Айгөл Фәтхлисламова, Гөлфиә Тимерғәлиева, Фаит Нәбиев, Илнур Саяпов, Айрат Камалов һәм Рөстәм Ахуновтарҙың сығыштары дәррәү алҡыштарға күмелде.

Ауыл биләмәһе тураһында видеоролик күрһәтелде. Ләкин уны бер аҙ камиллаштыраһы бар ине.
Әлеге программаны сәхнәгә сығарыуға китапханасы Зөһрә Ғарипова, уҡытыусы Индира Ниғмәтйәнова, мәҙәниәт хеҙмәткәрҙәре ҙур көс һалған. Ғөмумән, ауыл биләмәһе әҙерләгән программа маҡтауға лайыҡ.

Ҡайынлыҡ ауыл биләмәһенең “Тыуған яғым – моңдар иле” исемле концерт программаһы хеҙмәт һөйгән яҡташтарын данлауға, хозур тәбиғәттәрен маҡтауға ҡоролдо. Ысынлап та, был төбәк йыр-моңға бай, һәләтле кешеләре менән ғорурлана ала. Розалия Йосопова етәкләгән “Созвездие” (“Йондоҙлоҡ”) бейеү ансамбленең төрлө милләттәрҙең бейеүҙәрен оҫта итеп башҡарыуы тамашаның башынан аҙағына тиклем йәм өҫтәп торҙо. Биләмәлә бер-нисә милләт вәкиле дуҫ булып, берҙәм йәшәгәнлеген дә сығыштарында сағылдырҙы йәш бейеүселәр. Илнур Шәйхетдинов, Гүзәл Ибраһимова, Земфира һәм Владислав Мөфтиевтар, Руслан Дәүләтбаев, Алһыу һәм Илдан Нурихановтар, Регина Йөҙлөкәева, Эльмир Сәйетғәлиев, Альбина Әғзамованың иҫ киткес йырҙарын тамашасы тын да алмайынса тыңланы. Ир-аттарҙың йыр ансамбле тамашасыны дәртләндереп, дәррәү ҡул сабырға мәжбүр итте. Эльвира Сәйетғәлиеваның синтезаторҙа оҫта уйнауы ла һоҡланғыс булды. Вәкил Әғзәмовтың ҡурай моңо тыуған илдең киңлектәре буйынса таралып, Башҡортостанға мәҙхиә йырланы.

 Һәр концерт номеры һәм башҡарыусы тураһында мәғлүмәт экранда яҙылып, фотолары менән күрһәтелеп барҙы. Тыуған яҡҡа бағышланған шиғри юлдар музыкаль оҙатып барыуҙа тәьҫирле һәм сәнғәтле яңғыраны. Был донъянан киткән актерҙар  кино-йондоҙҙарҙың портреттары ла экранда сағылыш тапты. Был күренеш йәшәү- миҙгел генә икәнлегенә баҫым яһаны. Концерттың тематикаһын "ҡайынлыҡлылар"тулыһынса асты.

Видеоролик Ҡайынлыҡ ауыл биләмәһенең үткәнен, бөгөнгөһен барлап, колхоз эшенә ауыл халҡының гөрләп, берҙәм булып йөрөгән ваҡыттарҙы сағылдырған фотоһурәттәрҙе лә ҡулланып, тамашасыға биләмәнең ғорурлығы булырҙай шәхестәре тураһында мәғлүмәттәрҙе еткерә алды. Ауылдарҙың үткәне, бөгөнгөһө, тәбиғәте, билдәле шәхестәре тураһында ла һөйләне фотоларға бай видеосюжет.

Ғөмүмән, беҙҙең тормош үҙе кино бит ул. Комедия, трагедия һ.б. иғтибар менән күҙәтәһе генә беҙгә – актер һәм тамашасыға. Ҡыҫкаһы, жюри "ҡайынлыҡлылар" тарафынан тәҡдим ителгән тамаша менән ҡәнәғәт булып ҡайтып китте.

М. Әхмәтйәнова.

Сығанаҡ: Борай районының “Алға” гәзите