Алтын шәлле йомарт, һағышлы көҙ килде.  Тирә-яҡ тел менән аңлатып бөтөрә алмаҫлыҡ гүзәллеккә, серлелеккә сумды. Көҙгө мул уңыштарҙы йыйып бөткән мәлдә  илебеҙҙә матур күренеш- Өлкәндәр көнөн билдәләп үтеү ғәҙәткә керҙе.

Шундай мөһим саранан Туймазы театры ла  ситтә ҡалмай, һәр йыл фиҙәкәр хеҙмәтен һалған, бөгөнгө көндә инде хаҡлы ялда булған хеҙмәттәштәрен йыйҙы.
Зирәк аҡыллы,  тәрән тәжрибәле,  баҫалҡы, итәғәтле  апай, ағайҙар килгәс,  байрам залы нурланып, балҡып  китте. Ҙур хөрмәт менән ҡунаҡтарҙы иң элек театрҙың директоры, Башҡортостандың атҡаҙанған мәҙәниәт хеҙмәткәре Фирҙәт Фәрит улы Ғәбиҙуллин  сәләмләне,  уларға иҫәнлек-һаулыҡ, байрам кәйефе теләне. 
Даими яңғыраған ҡотлауҙар, матур теләктәр күңелдең иң нескә ҡылдарын сиртер моңло йырҙар менән алышынды. Өлкәндәрҙе тәбрикләр өсөн театрҙың тәүге артистарының береһе,  Башҡортостандың атҡаҙанған артисы Венер Закиров килгән ине. Талантлы артист ҡунактарҙы таң ҡалдырды. Айырыуса Туймазы театрының беренсе спектакле “Аҡ ҡалфаҡ” драмаһындағы Баҡый йырын нәҡ  27 йыл элек ул ролде уйнаған актер тарафынан ишетеү өлкән апай –ағайҙар өсөн ҙур ҡыуаныс, оло ваҡиға булды.