Мәғлүм булыуынса, 7-14 сентябрь көндәре Өфөлә Төрки телле театрҙарҙың "Туғанлыҡ" VI Халыҡ-ара фестивале башлана. Фестиваль сиктәрендә 10 сентябрҙә, Мостай Кәрим исемендәге Милли йәштәр театры Альберт Камюҙың «Калигула» трагедияһын күрһәтәсәк.

Спектаклдең режиссеры- Азат Йыһаншин, композиторы-Урал Иҙелбаев.

Калигула — Гай Юлий Цезарҙың ҡушаматы. Рим императоры бала сағынан уҡ ошо ҡушаматты йөрөткән. Камюҙың әҫәре — власть һәм яңғыҙлыҡ трагедияһы, азатлыҡ һәм ҡоллоҡ араһында һайлау, хис-тойғолар ҡайнарлығы ул.

«Минең өсөн Калигула Камюҙың пьесаһы персонажы булараҡ бөтөнләй диуана түгел. Ул залимлыҡтың ҡурҡыу нигеҙендә барлыҡҡа килеүен раҫлап, кешенең тәбиғәтенән көлгән кеүек», — ти Азат Йыһаншин.

«Калигула» спектакленең яҙмышы ҡатмарлы, әммә бик ҡыҙыҡлы. Азат Йыһаншин әҫәрҙе тәүге тапҡыр 2014 йылда Стәрлетамаҡ дәүләт башҡорт драма театрында ҡуйҙы. Ул саҡта тәнҡитселәр уның эшен йылы ҡабул иткәйне. Төп геройҙы бер үк артистың уйнауы режиссер өсөн ифрат мөһим булғанлыҡтан, Йәштәр театры труппаһына Вадим Ҡылысов саҡырылған http://www.bashinform.ru/bash/926256/.

Спектаклдә театрҙың билдәле һәм талантлы актерҙары уйнай: Башҡортостандың халыҡ артистары Мәғәфүр Усманов, Рушана Бабич, республиканың атҡаҙанған артистары Нәғим Нурғәлин, Илсур Хәбиров, Венер Камалов.