4 -7 декабрҙә Туймазы театрының яңы сәхнәләштерелгән спектаклдәрен сәнғәт фәндәре кандидаты, ГИТИС профессоры Анна Степанова Анатольевна, остаздың шәкерттәре--ГИТИС студенттары, Өфө дәүләт сәнғәт институты остазы, театр белгесе Рида Буранова ҡараны.

 Күренекле театр әһелдәре иғтибарына коллектив бөйөк Островскийҙың “Ҡоторған аҡсалар” комедияһын; башҡорт драматургы Х.Ибраһимовтың “Еҙнәкәй” музыкаль комедияһын, йәш драматург В.Шергиндың “Колбаса. Фрагменттар” комедияһын һәм  драматург И.Зәйниевтың “Әрем еҫе” мелодрамаһын тәҡдим итте.
Һәр спектаклдән һуң ижадсылар театр белгестәре яһаған анализды тыңларға йыйылды.
Екатеринбург режиссеры, актеры сәхнәләштергән “Колбаса.Фрагменттар”комедияһын ҡарап, тәнҡитселәр ижад коллективының был эшен яңылыҡҡа, үҙгәрешкә табан яһалған ҡыйыу аҙым тип баһаланы. Белгестәр фекеренсә, ижадсылар бик күп мәртәбәләр ҡулланылған, ғәҙәткә кергән традицион сәхнә алымдарын инҡар итеп, яңыса спектакль сәхнәләштергән.  

“Колбаса.Фрагменттар” комедияһы бөгөнгө ысынбарлыҡтың сағылышы. Ә ысынбарлыҡ алһыу төҫтәрҙән генә тормай. Шуңа күрә спектакль был тормоштоң йәмһеҙ, ҡырыҫ яҡтарын да үҙ эсенә алған. Белгестәр фекеренсә, спектакль тамашасыларҙы бик мөһим “һөйләшеүгә” әҙерләй.

Анна Анатольевна бөйөк драматургтың 19 быуатта яҙылған әҫәренең бөгөнгө көндә лә актуалеген асыҡланы.