Өфөлә V Рәсәй-ҡырғыҙ төбәк-ара конференцияһы бара. Кисә “Евразияның интеграция процесы юҫығында төбәк-ара бәйләнештәрҙең үҫеше” тип аталған сараның пленар ултырышы үтте. Уның эшендә республика Башлығы Рөстәм Хәмитов та ҡатнашты.
Рәсәй-ҡырғыҙ төбәк-ара конференцияһы сиктәрендә бик күп эшлекле осрашыуҙар, төрлө темаларға арнал­ған “түңәрәк өҫтәл”дәр ҡаралған. Ҡунаҡтарҙы беҙҙә иҡтисади үҫеш мөмкинлектәре, айырыуса ауыл хужа­лығы тармағы ҡыҙыҡһындыра. Осрашыуҙа импортты алмаштырыуға ҡағылышлы ҡыҙыҡлы тәҡдимдәр яңғыраны. Ҡырғыҙстан Республикаһынан килгән делегация ағзалары шулай уҡ Археология һәм этнография музейында булды, “Алексеевка” совхозының эшмәкәр­леге менән яҡындан танышты.
Конференция сиктәрендә туризм темаһы ла өҫтөнлөк итте. Ҡырғыҙстан Республикаһының мәҙәниәт, мәғлүмәт һәм туризм министры урынбаҫары Азамат Жаманкулов­тың фекеренсә, Рәсәйҙә, шул иҫәптән Башҡортостанда был йәһәттән хеҙмәттәшлек итеүгә мөмкинлек бар. Киләсәктә туризм тармағы буйынса ике яҡлы киле­шеүҙәр төҙөлөр тип күҙаллана.

Сығанаҡ